– Vi kan aldri dele ut for mange refleksar

- Vi har delt ut refleksar på Refleksdagen i mange år, og vi ser at ungdomane blir stadig meir positive når dei får refleksar hos oss, seier førstekonsulent Monica Åsnes i samferdsleavdelinga i Sogn og Fjordane fylkeskommune.

Du har garantert høyrt oppmodinga tallause gonger før, men den kan faktisk ikkje gjentakast for ofte: Bruk refleks.

Vel du å gå utan refleks vil ein bilist i 50 km/t berre ha to sekund på å sjå deg. Brukar du refleks, har bilisten ti sekund, ifølgje Trygg Trafikk. Refleks er difor ei billig livsforsikring.

- Vi treng alle ei påminning

Målet med Refleksdagen er å få fleire til å bruke refleks, og få ned talet på ulukker der fotgjengarar er involvert.

Dagen blir markert over heile landet. I Sogndal vart elevar ved Sogndal vidaregåande møtte av gulkledde representantar frå både skulen, Statens vegvesen, politiet og fylkeskommunen i dag tidleg.

- Det er viktig for fylkeskommunen å engasjere seg i trafikktryggleik. Vi har mellom anna ansvar for skuleskyss, og det er viktig å bidra der vi kan, seier Åsnes i fylkeskommunen.

Overingeniør i Statens vegvesen, Johannes Tubbene, var også med å dele ut refleksar i morgontimane.

- Statens vegvesen har eit aktivt forhold til trafikktryggleik. Eg trur dette har ein effekt. Ungdomane har fått ei påminning, så litt fleire vil nok bruke refleks etter i dag, seier han.

Halvparten av oss droppar refleks

Innbyggjarane i Sogn og Fjordane er ifølgje tala til Trygg Trafikk dei flinkaste i landet til å bruke refleks. Likevel er det mange som må skjerpe seg. For teljingane viser at nesten halvparten av oss droppar refleks.

- Det er så lettvint å hekte på seg ein refleks. Men det er nok med andre som med meg, det er for gjort å gløyme refleksen. Difor treng vi å bli minna på det, jamt og trutt, seier Tubbene i Statens vegvesen.

På landsbasis viser Trygg Trafikk sine teljingar at berre fire av ti vaksne brukar refleks. Å dele ut refleksar til unge vaksne kan vere eit viktig verkemiddel for å snu trenden.

- Ungdom som er byrja på vidaregåande er gjerne komne i ein alder der dei er litt meir tilbakelente, og kanskje ikkje brukar refleks. Difor er det viktig for oss å prøve å påverke dei i rett retning, seier Åsnes i samferdsleavdelinga.

Trygg Trafikk sine reflekstips:

Jo meir refleks, jo meir er du synleg!

• Fest refleks på alle jakker og baggar
• Bruk refleks som beveger seg når du går – dei syner best
• Heng refleksen i knehøgd
• Bruk to refleksar slik at du er synleg frå alle kantar
• Sjekk at refleksen ikkje er veldig ripete, då fungerer den dårleg